امریکی صدر ڈونلڈ ٹرمپ
واشنگٹن ۔۔۔ نیوز ٹائم
امریکی صدر ڈونلڈ ٹرمپ کی کوشش ہے کہ امریکہ کے 2018 ء کے بجٹ میں دفاعی اخراجات 54 ارب ڈالر تک کا اضافہ کیا جائے۔ امریکی میڈیا کے مطابق مختلف سرکاری ایجنسیوں کو بجٹ کا مسودہ بھیجا گیا تھا، تجویز کردہ مسودے میں ماحولیاتی بجٹ اور غیر ملکی امداد میں کمی کی گئی ہے، تاہم ٹرمپ کے پلان میں بڑے فلاحی پروگراموں جیسے سوشل سیکیورٹی اور میڈی کیئر کو نہیں چھیڑا گیا جبکہ ریپبلکن پارٹی نے ان میں اصلاحات کا مطالبہ کیا ہے۔ صدر ٹرمپ نے وائٹ ہائوس میں گورنز کی ایک ملاقات میں کہا ہے کہ ہم نے کم (وسائل) کے ساتھ زیادہ کام کرنا ہے، اور حکومت کو کم خرچ پر چلانا ہے اور احتساب کرنا ہے، صدر ٹرمپ نے بتایا ہے آج ملک کے انفراسٹرکچر (تعمیری ڈھانچے) کے بارے میں کانگریس کے سامنے اپنی تقریر میں بتائوں گا، ہمیں انفراسٹرکچر پر بہت توجہ دینی ہے۔ واضح رہے کہ صدر ٹرمپ نے اپنی انتخابی مہم میں کہا تھا کہ وہ دفاعی اخراجات میں اضافہ کریں گے اور فلاحی پروگراموں کو محفوظ رکھیں گے۔ اس دوران ان کا کہنا تھا کہ ان کا بجٹ ملٹری، تحفظ، اور اقتصادی ترقی پر توجہ دے گا، توقع ہے کہ صدر ٹرمپ اپنے مجوزہ بجٹ کا حتمی مسودہ مارچ کے وسط میں پیش کریں گے۔
