جاپان میں اولمپک گیمز کا انعقاد 2021 ء میں کروائے جانے کا امکان
ٹوکیو ۔۔۔ نیوز ٹائم
اولمپکس گیمز 2020 ملتوی کر دیے گئے، کرونا وائرس خدشات کے باعث جاپان میں اولمپک گیمز کا انعقاد 2021 ء میں کروائے جانے کا امکان۔ تفصیلات کے مطابق بین الاقوامی اولپمک کمیٹی نے جاپان کے شہر ٹوکیو میں شیڈول اولمپکس گیمز 2020 ملتوی کرنے کا اعلان کیا ہے۔ بین الاقوامی اولپمک کمیٹی کا کہنا ہے کہ کرونا وائرس کے پھیلائو میں اضافے کے بعد بیشتر ممالک اولپمک گیمز میں شرکت سے گریزاں تھے، اس لیے فیصلہ کیا گیا کہ گیمز کو ملتوی کر دیا جائے۔ کہا گیا ہے کہ فی الحال ٹوکیو اولمپک گیمز کے انعقاد کی نئی تاریخ کا فیصلہ تو نہیں کیا گیا، تاہم امکان ہے کہ گیمز کا انعقاد اب 2021 ء میں ہی ممکن ہو پائے گا۔ واضح رہے کہ ٹوکیو اولمپکس کا انعقاد جاپان میں رواں برس 24 جولائی سے 9 اگست تک کیا جانا تھا جس کے لیے جاپان میں بڑے پیمانے پر انتظامات بھی کیے جا رہے تھے تاہم عالمگیر وبا کورونا وائرس کے جہاں کھیلوں کے دیگر ایونٹس منسوخ یا ملتوی ہوئے وہیں ٹوکیو اولمپکس کا انعقاد بھی ملتوی کرنا پڑ گیا ہے۔
غیر ملکی خبر ایجنسی کے مطابق کینیڈا نے اولمپکس 2020 کے لیے اپنے کھلاڑی ٹوکیو نہ بھیجنے کا فیصلہ کرتے ہوئے مقابلوں کو ایک سال کے لیے ملتوی کرنے کا مطالبہ کیا جبکہ کینیڈا کے بعد آسٹریلیا نے بھی اولمپکس 2020 سے دستبرداری کا اعلان کیا۔ اس تمام صورتحال میں جاپان کے وزیر اعظم شنزو آبے نے بھی واضح اشارہ دیا تھا کہ ٹوکیو اولمپکس کو ملتوی کرنا ناگزیر ہو سکتا ہے۔ امریکی صدر ڈونلڈ ٹرمپ بھی کورونا وائرس کے خدشے پیش نظر ٹوکیو اولمپکس ملتوی کرنے کی تجویز پیش کر چکے ہیں۔ خیال رہے کہ کورونا وائرس کے باعث پاکستان سپر لیگ، آئی پی ایل، انگلیڈ اور سری لنکا کے درمیان ٹیسٹ سیریز، آسٹریلیا اور نیوزی لینڈ کے درمیان ون ڈے سیریز سمیت کھلیوں کے کئی ایونٹس اب تک منسوخ ہو چکے ہیں۔ اب کرونا وائرس کے باعث دنیا کا سب سے بڑا کھیلوں کا ایونٹ اولپمک گیمز بھی ملتوی کر دیا گیا ہے۔
