فوجی کارروائی کے دوران ہلاک ہونے والے ایک 20 سالہ طالب علم تھئی مونگ مونگ کی آخری رسومات ادا ہو رہی ہے۔
ینگون ۔۔۔ نیوز ٹائم
میانمار میں اتوار کے روز بھی مختلف مقامات پر سیکیورٹی فورسز نے مظاہرین پر فائرنگ کی جس میں مزید 12 افراد ہلاک ہو گئے۔ ادھر ہفتے کے روز فوج کی جانب سے یکم فروری کے بعد سے شدید ترین کارروائی میں 114 افراد کی ہلاکت کے واقعے کی دنیا کے ایک درجن سے زائد ملکوں نے مذمت کی ہے۔ ہلاک ہونے والوں میں 10 سے 16 سال کی عمر کے کم از کم 6 بچے شامل تھے۔ عینی شاہدین نے خبر رساں ایجنسی روئٹرز سے بات کرتے ہوئے بتایا کہ لوگ ہفتے کے روز فوجی کارروائی کے دوران ہلاک ہونے والے ایک 20 سالہ طالب علم تھئی مونگ مونگ (Thae Maung Maung) کی آخری رسومات ادا کرنے کے لیے اقتصادی دارالحکومت ینگون کے بوگا (Bago) قصبے میں جمع ہوئے تھے۔ آئی نامی ایک خاتون کا کہنا تھا ہم تھئی مانگ (Thae Maung Maung) کے لیے انقلابی نغمے گا رہے تھے کہ سیکیورٹی فورسز وہاں پہنچ گئیں اور ہم پر فائرنگ شروع کر دی۔ ہم لوگ وہاں سے کسی طرح جان بچا کر بھاگے۔
ہلاکتوں کی تعداد 450 سے تجاوز:
میانمار میں عوامی مظاہروں کے دوران ہلاکتوں کی مانیٹرنگ کرنے والی ایک غیر سرکاری تنظیم اسسٹنس ایسوسی ایشن فار پولیٹیکل پریزنرز (اے اے پی پی) نے بتایا کہ اتوار کے روز ملک کے مختلف مقامات پر سیکیورٹی فورسز کی فائرنگ میں 12 افراد ہلاک ہو گئے جس کے ساتھ ہی یکم فروری سے اب تک مظاہروں کے دوران ہلاک ہونے والوں کی تعداد 459 ہو گئی ہے۔ عینی شاہدین اور مقامی میڈیا کا کہنا ہے کہ فوجی بغاوت کے بعد سے فوج نے نسلی ملیشیا پر فضائی حملے شروع کر دیے ہیں جس کے بعد سرحدی علاقوں میں رہنے والے ہزاروں افراد جان بچانے کے لیے تھائی لینڈ بھاگ گئے ہیں۔ گو کہ ینگون یا منڈالے (Mandalay) میں، جہاں ہفتے کے روز فوج کی کارروائی میں سب سے زیادہ ہلاکتیں ہوئی تھیں، اتوار کے روز بڑے مظاہروں کی اطلاعات نہیں ہیں تاہم منڈالے (Mandalay) میں دیر شام لوگوں نے ایک تھانے کو گھیر لیا۔ مظاہرین سکیورٹی فورسز پر 5 مکانات میں آگ لگانے اور اسے لوٹ لینے کے الزامات لگا رہے تھے۔ اس واقعے کی تصدیق کے لیے پولیس سے رابطہ نہیں ہو سکا۔
افسوسناک اور وحشیانہ کارروائی:
ہفتے کے روز کی خونریزی کی مغربی دنیا نے بھی شدید مذمت کی اور میانمار کے لیے اقوام متحدہ کے نمائندہ خصوصی نے کہا کہ فوج ‘اجتماعی قتل عام’ کر رہی ہے اور عالمی طاقتوں سے مطالبہ کیا کہ وہ فوجی جنتا کو اقتدار سے الگ تھلگ اور اسلحے تک رسائی روکنے کے لیے اقدامات کریں۔امریکی صدر جو بائیڈن نے نامہ نگاروں سے بات چیت کرتے ہوئے میانمار میں فوجی کارروائی کی سخت مذمت کی۔ انہوں نے کہا یہ افسوسناک اور انتہائی وحشیانہ کارروائی ہے۔ مجھے جو اطلاعات ملی ہیں اس کے مطابق بہت سارے لوگوں کو بلاوجہ قتل کر دیا گیا۔ ایک سوال کے جواب میں امریکی صدر نے کہا کہ وہ میانمار پر پابندی عائد کرنے کے سلسلے میں غور کر رہے ہیں۔
اقوام متحدہ کے نمائندہ خصوصی ٹام اینڈریوز ن (Tom Andrews) ے کہا کہ اب وقت آ گیا ہے کہ دنیا کارروائی کرے، اگر اقوام متحدہ کی سلامتی کونسل کے توسط سے نہیں تو بین الاقوامی ہنگامی اجلاس کے ذریعے یہ کارروائی عمل میں لائی جائے اور فوجی جنتا کو تیل اور گیس کی آمدن جیسی مالی اعانت سمیت اسلحہ تک رسائی کو روک دیا جانا چاہیے۔ انہوں نے ایک بیان میں کہا کہ مذمت یا اظہار تشویش جیسے الفاظ میانمار کے عوام کے لیے کھوکھلے دعوے معلوم ہوتے ہیں کیونکہ فوج نے وہاں بڑے پیمانے پر قتل کا ارتکاب کیا ہے۔ قبل ازیں دنیا کے 12 اہم ممالک کے فوجی سربراہان نے بھی اپنے ایک مشترکہ بیان میں میانمار میں اقتدار پر قابض فوج کی طرف سے طاقت کے پرتشدد استعمال اور سینکڑوں شہری ہلاکتوں کی مذمت کی۔ ان عسکری رہنمائوں نے مطالبہ کیا کہ میانمار کی فوج کو پیشہ وارانہ فوج کے بین الاقوامی معیارات کا احترام کرنا چاہیے۔ اس بارے میں جاری کیے گئے ایک اعلامیے پر امریکی فوج کے چیف آف سٹاف مارک مِلی (Mark Milley) اور کئی دیگر ممالک کی مسلح افواج کے سربراہان نے دستخط کیے۔ ان ممالک میں آسٹریلیا، کینیڈا، جرمنی، یونان، اٹلی، جاپان، ڈنمارک، نیدرلینڈز، نیوزی لینڈ، جنوبی کوریا اور برطانیہ شامل ہیں۔a
